Angel Di Maria, mesfushori i Paris Saint-Germain ka pasur fatin që të luaj me dy futbollistët më të mirë Ronaldon dhe Messin. Ndërsa së fundmi ai është duke luajtur me yllin brazilian, që shumë shpejt pritet të prekë majën, Neymar Jr. Merkaton që lamë pas Di Maria ka qenë mjaft i lidhur me një kalim tek Barcelona, të cilën e ka pranuar vetë ai.
“Kam qenë shumë pranë Barcelona-s,” shprehet ai. “Fatkeqësisht, ka gjëra në futboll që e bënë të pamundur.”
Di Maria do të jetë pjesë e skuadrës së Argjentinës në Kupën e Botës dhe ai e mohon se ekipit i mungon forca e karakterit. “Kemi arritur në tre finale por nuk kishim fat t’i fitonim, jo për shkak se nuk kishim guxim. Shakatë dhe ‘memet’ për lojtarët e kombëtares na kanë lënduar jashtë mase, por më ka ndihmuar shumë një psikolog.” Në fund ai ka folur edhe për krahasimin midis Messi-t dhe Cristiano-s. “Cristiano është një lojtar i shkëlqyer, por të luash në të njëjtën periudhë me Messi-n t’i vështirëson shumë gjërat. Nuk ka fjalë për të përshkruar Leo-n, ai gjithmonë të befason. Çdo vit ai është më i miri dhe kjo është arsyeja pse Sampaoli më do pranë tij.”
