Virtus Entella, shpresa e fundit që Llullaku të shpëtojë sezonin

Azdren Llullaku është lojtari i radhës kuqezi që pritet ti bashkohet një ekipi italian. Gjasat janë që pas Naser Alijit, Virtus Entella do të nënshkruaj edhe me sulmuesin e kombëtares shqiptare. 29-vjeçari shkëputi kontratën me Astanën dhe u duk se do të qëndronte sërish në kampionatin kazak, me ekipin e Ordabasit, ku iu bashkua në Turqi në fazën përgatitore. Gjithçka dukej se po ecte normalisht, pasi sulmuesi kishte startuar edhe në një miqësore për ekipin dhe shënoi gol në barazimin 2-2 me ekipin çek Sllovaçko.

Por duket se klubi me futbollistin nuk kanë rënë dakord për disa detaje në kontratë dhe kjo ka bërë që bashkëpunimi të ndërpritet. Llullaku është larguar nga grumbullimi me destinacion Bolognan ashtu siç e konfirmoi edhe në faqen e tij në “Instagram”.Udhëtim jo i rastësishëm, sepse në Itali është fare pranë mbylljes së akordit me Virtus Entellan. Edhe pse merkato në Serinë B është mbyllur, djaloshi nga Istogu mund të përfitojë nga rregulli i transferimit si lojtar i lirë dhe mund të realizojë ëndrrën për të luajtur në vendin ku është rritur dhe pranë familjes së tij.