Forcat RENEA dhe FNSH kanë zbarkuar së bashku me Policinë e Shtetit në Elbasan, në kuadrin e aksionit policor “Forca e Ligjit”.
Mësohet se RENEA dhe FNSH kanë qenë sërish në aksion gjatë natës, pas shkatërrimit të një grupi të strukturuar kriminal, ku u arrestuan 8 persona. Pronat e fisit Çapja dhe Çelaj po kalohen në sitë, pas implikimeve të tyre në disa ngjarje kriminale.
BalkanWeb bën me dije se RENEA ndodhet aktualisht në tregun agro-ushqimor dhe në disa biznese të familjes Çapja. Kujtojmë se në aksionin e djeshëm u sekuestruan 70 kallëpe me tritol, armë zjarri dhe lëndë narkotike, ndërsa 8 të arrestuarit ishin nga Pogradeci dhe Gramshi.
Policia përdori metoda proaktive për këtë operacion, duke infiltruar kështu në grup edhe agjentë civilë, ndërsa operacioni u drejtua nga drejtori i komanduar i Policisë së Elbasanit, Altin Qato.
Mëngjesin e sotëm janë shoqëruar edhe 4 persona të tjerë në Elbasan, të dyshuar si autorë të atentatit ndaj Lulzim Kullës në Shkodër.
Aksionet në fjalë vijnë pas vizitës së Prokurores së Përgjithshme Arta Marku në Elbasan, ku takoi prokurorët dhe dha mesazhe të qarta, ndërsa e cilësoi Elbasanin një ‘pikë të nxehtë’ të grupeve kriminale.
