Enea Mihaj, mbrojtësi pogradecar i cili ka qenë pjesë e kombëtares Shpresa duket se na ka “tradhtuar”. Ai luan për ekipin grek të Panteloikosit dhe tani i ka mbyllur derën kuqezinjve për të veshur fanellën e ekipit helen, pasi e kishte një ëndërr. 19-vjeçari i cili ka mbajtur veshur fanellën kuqezi në sfidën ndaj Izraleit U-21 në tetor 2016 dhe kundër Islandës U-17 një vit më vonë, tashmë na ka braktisur.
Duke folur për mediat greke, Mihaj sqaroi se pse kishte marrë këtë vendim kur ishte deri dje pjesë e kuqezinjve. “Është gjithmonë një nder për një futbollist kur e thërret Kombëtarja. Sa i përket pjesës së dytë të pyetjes, nuk është objektivi im të promovohem te ekipi kombëtar A i Shqipërisë. Kam refuzuar thirrjet e fundit nga përfaqësuesja Shpresa pasi kur rritesh, i kupton gjërat më mirë, nuk je më aq entuziast për ftesat.
E përsëris, është një nder kur të thërrasin në Kombëtare, por unë ndjehem më mirë nëse do të kem mundësinë të luaj në kombëtaren e Greqisë dhe ky është objektivi im për të ardhmen. A mund të arrijë Shqipëria përsëri në Europian? Mendoj se po, pasi ka lojtarë cilësorë. Pse jo?” u shpreh Mihaj për mediat greke.
