Pastore drejt Interi, Emery: Dua të qëndrojë, por ai do Botërorin

Javier Pastore duket si elementi që do të zgjidhë problemet tek Interi dhe për këtë arsye zikaltërit janë hedhur në sulm për të nënshkruar me argjentinasin. Përfaqësuesit e ekipit të Milanos kanë udhëtuar sërish ditën e sotme drejt Parisit dhe pritet që të diskutohen detajet e fundit për të mbyllur këtë transferim.

“PSG-ja nuk dëshiron të shesë Pastoren, por si Presidenti I klubit, ashtu edhe Drejtori Sportiv, i duan të mirën atij dhe do të vendosin në bazë të dëshirës së futbollistit. Për momentin Pastores i intereson të luajë sa më shumë dhe të jetë protagonist, pasi nuk dëshiron të humbë botërorin ‘Rusi 2018’, që mund të jetë edhe i fundit për të”, u shpreh mëngjesin e sotëm menaxheri i futbollistit, Simonian, për mediet franceze.

L’equipe raporton se marrëveshja mes dy klubeve pritet të arrihet mbi bazën e huazimit për 4 milionë euro dhe blerjes në rast kualifikimi në Champions, për 25 milionë të tjera. Zikaltrit e kanë bërë të qartë qëndrimin e tyre ndaj francezëve, se nëse nuk e marrin tani Pastoren, nuk do të rihapin negociatat në verë. Nga ana tjetwr trajneri i Paris Saint-Germain, Unai Emery këmbëngul se dëshiron që Javier Pastore të qëndrojë në skuadër, por thotë për objektivit të Interit i takon vetë për të vendosur se çfarë dëshiron”.

“Dua që Javier Pastore të qëndrojë me ne, është më mirë për ekipin. Kam folur shumë me të. Ajo që thuhet jashtë është diçka tjetër, është përgjegjësia e tij. Pastore është një lojtar i madh dhe kur ai është gati fizikisht ai është i rëndësishëm. Mendimi im është se unë dua që ai të qëndrojë këtu, atëherë i takon atij të shohë se çfarë dëshiron në nivel individual. Me Kupën e Botës këtë vit, çdo lojtar dëshiron të luajë më shumë”, u shpreh trajneri francez.