Gara për kreun e FSHF-së sa vjen dhe bëhet më e ashpër, ku Bashkim Fino dhe Armand Duka kanë hedhur shumë akuza të rënda ndaj njëri-tjetrit. Ndërsa edhe mediat e kanë lënë në harresë kandidatin që ka lidhje me sportin, Shpëtim Halën në harresë. Ky i fundit në një prononcim për mediat është shfaqur i shqetësuar rreth situatave më të fundit që po ndodhin, ku pohon se do të informojë UEFA-n për gjithçka.
“Jam i shqetësuar për akuzat e ndërsjellta nga të dy kandidatët, me ndërhyrjen e politikës në këto zgjedhje, pasi mund të dënohet futbolli shqiptar. Këtë shqetësim po e ndjekin UEFA dhe FIFA dhe nuk e shoh të udhës që njerëz të veshur me pushtet të bëhen pjesë e një gare. I bëj thirrje atyre që kanë interes për futbollin në Shqipëri, që të mos bëjnë presion dhe të takojnë delegatët. Një tjetër shqetësim është edhe koha mediatike, ku në krahasim me dy rivalët e tjerë kam pasur shumë pak kohë në dispozicion, si në mediat lokale dhe ato kombëtare. Këto shqetësime do t’ia bëj të ditura UEFA-s, ku po mbledh fakte”, u shpreh Hala në fjalën e tij.
Më pas, i pyetur nga gazetarët, ai u shpreh se nuk do të largohet nga gara, edhe pse njerëzve pranë tij u janë dërguar fjalë për t’u larguar. “Për aq kohë sa jam pjesë e garës do t’i qëndroj deri në fund, pavarësisht se mund të vijnë presione nga njëri apo tjetri kandidat. Personalisht nuk më kanë bërë asnjë presion, por u kanë ardhur mesazhe personave të tjerë, jo nga Duka dhe Fino, nuk mund ta them këtë. Nuk preferoj askënd midis Finos dhe Dukës, por mendoj se unë do të fitoj në këtë garë”, vijoi më tej Hala.
Në lidhje me njohjen e delegatëve dhe takimit me Lazen, ai u shpreh: “Deri në mbarimin e afatit për delegatët ka pasur shumë ndryshime, por pak a shumë delegatët njihen. Unë i njoh për shkak të kontakteve që kam patur me klubet e tjera. Nuk e shoh shumë shqetësuese në krahasim me problematikat e tjera. Takimi me Lazen? E falënderoj që u tregua i gatshëm për të më takuar. Biseduam për futbollin në Shqipëri, por e falënderoj edhe për faktin që u tregua i sinqertë dhe votën do t’ia japë Z. Duka”, u shpreh Shpëtim Hala, ish gjyqtari i futbollit që pretendon postin e presidentit të FSHF-së.
