Lideri i opozitës ruse Alexei Navalny akuzoi Presidentin Vladimir Putin se ka ngritur një regjim të bazuar në korrupsion. Navalny tha për CNN se Putin ka frikë nga opozita, edhe pse sipas sondazheve në Rusi, ai ka mbështetjen e shumicës së popullatës.
“Putin ka frikë nga çdo lloj gare që është e vërtetë. Ai lejon të kandidojnë vetëm ata që nuk do të mund t’i rezistonin, ata që as nuk bëjnë fushatë zgjedhore. Sipas të dhënave zyrtare, mbi 20% e popullsisë jetojnë nën minimumin e varfërisë dhe njerëzit pyesin, përse jemi kaq të varfër? Sepse ata vjedhin shumë,”deklaroi Navalny.
Kremlini i ka hedhur poshtë akuzat për korrupsion duke thënë se Navalny është një ndikues i rrezikshëm që kërkon ta zhysë Rusinë në kaos.
Alexei Navalny zyrtarisht është jashtë garës për zgjedhjet presidenciale të 18 marsit. Komisioni Zgjedhor në Rusi nuk e lejoi për shkak të një dënimi nga drejtësia ruse, dënim për të cilin, Navalny pretendon se është i motivuar politikisht.
