Një ngjarje e rëndë ka ndodhur në fshatin Cakran të Fierit, ku disa persona kanë dhunuar një fëmijë të mitur, të cilit i kanë bërë presion që të tregojë se ku i mban i ati lekët.
Policia e Fierit bën me dije se ngjarja ka ndodhur në banesën e shtetasit L.H, 42 vjeç, i cili nuk ndodhej në banesë në momentin kur grabitësit kanë hyrë për të vjedhur.
Kështu, ata kanë dhunuar 8-vjeçarin, djalin e L.H., duke i kërkuar me ngulm që të tregojë se ku i mban i ati lekët.
Nuk dihet nëse i mituri ka treguar diçka, as nëse grabitësit kanë mundur të marrin të holla nga banesa. Policia e Fierit thotë se atë e kanë dërguar në spital për mjekim, ndërsa po punohet për identifikimin e autorëve.
NJOFTIMI I POLICISË
Më datë 22.01.2018, u referuan materialet në Prokurorinë e Rrethit Gjyqësor Fier dhe po punohet për identifikimin dhe kapjen e autorëve pasi në fshatin Cakran, Fier, pasi persona të paidentifikuar janë futur në banesën e shtetasit L.H, 42 vjeç dhe kanë lënduar fëmijën e tij 8 vjeçar, duke i kërkuar vendndodhjen e lekëve të prindërve, të cilët nuk ndodheshin në banese. Fëmija mori mjekim ne spital dhe tani ndodhet në banesë (Nenet 139 e 22 të Kodit Penal).
