Kategoria Superiore rikthehet të premten me sfida mjaft interesante dhe me emra të rinj në fushën e lojës. Futbolli i luajtur rikthehet në datën 26 Janar me 3 takime që luhen njëkohësisht në orën 14.00.
Sfida e parë do të zhvillohet në Gjirokastër ku Luftëtari pret kryesuesit e Skënderbeut. Mjaft interesante do të jetë sfida për Bregun dhe Abazajn, të dy do tu bashkohen korçarëve në fund të sezonit dhe kjo përballje do të shërbejë për të treguar edhe vlerat e vërteta të tyre. Ndërsa risi në këtë sfidë është Vasil Shkurtaj i cili është bashkuar së fundmi me Luftëtarin dhe pret të bëjë debutimin.
Surpriza e fazës së parë, Kamza, do të presë në shtëpi Laçin. Vendasit kanë humbur shërbimet e kroatit Fustar, por spikat afrimi i Hair Zeqirit, ndërsa kurbinasit janë përforcuar me Shtubinën. Por situata është më e rëndë tek Lushnja dhe Teuta mbetet e zymtë dhe pritet që kthesa të vijë në fazën e dytë të kampionatit. Të dy ekipet do të përballen mes tyre dhe do të tregojnë se cfarë ka ndryshuar për mirë mini-faza e dimrit dhe merkato.
Në orën 17:00, dy sfida të tjera absolutisht për të mos u humbur. Flamurtari, i përforcuar që në fillim të fazës përgatitore, me statusin e vendit të dytë pret Partizanin e cunguar në organikë, një sfidë jashtëzakonisht interesante, ndërkohë që Vllaznia e përforcuar me Sukajn në sulm e Malotën në mbrojtje pret në “Loro Boriçi” Kukësin e ri të Pacult me Gjokën që synon t’i prishë festën e debutimit trajnerit austriak. Një raund intrigues që, pas shumë zërave, zyrtarizimeve apo tratativave të merkatos, rikthen më në fund futbollin e luajtur.
Java 17 (e premte)
Luftëtari – Skënderbeu (ora 14:00)
Kamza – Laçi (ora 14:00)
Teuta – Lushnja (ora 14:00)
Vllaznia – Kukësi (ora 17:00)
Flamurtari – Partizani (ora 17:00)
