Kryeministri i Kosovës, Ramush Haradinaj ka kërkuar ndihmën e Podgoricës për mbështetjen e marrëveshjes së kufirit me Malin e Zi.
Gjatë mandatit të shkuar sa ishte në opozitë, Haradinaj i ka prirë kauzës kundër kësaj marrëveshjeje, pasi konsideronte se me të Kosova humb rreth 8 mijë hektarë, shkruan Koha Ditore.
Pak kohë pasi është vu në krye të Ekzekutivit, Qeveria e ka proceduar për ratifikim në Kuvend këtë dokument, edhe pse kreu i saj ka vazhduar të deklarojë se deputetët duhet ta rrëzojnë. Por, tashmë do një “moment të ri”, para se Projektligji të vihet në votim.
“Situata e re krijohet në rast se kryeministrat e të dyja vendeve dalin me deklaratë të përbashkët, me të cilën zotohen se Marrëveshja për kufirin do të rishqyrtohet kurdo që dalin fakte të reja ligjore. Duket që ka gatishmëri edhe në Podgoricë për të gjetur një zgjidhje të kësaj natyre. Ka pasur komunikime edhe në nivel ministrash, që e kanë trajtuar këtë temë dhe ka optimizëm”, ka thënë një burim në Qeveri. “Në rast se ka një akordim për tekstin e deklaratës, besoj që nuk do të ketë problem që Marrëveshja të kalojë në Kuvend”.
