Chelsea ka harruar të shënojë. Kur Morata dhe Hazard nuk janë në lartësinë e duhur atëherë Blutë e Londrës vetëm krijojnë raste dhe nuk finalizojnë. Në ndeshjen përballë Leicester është përsëritur historia e përballjes në FA Cup përballë Norwich City. Skuadra e Contes e dominoi lojën në tërësi, por vetëm kaq, pasi portat mbetën të paprekura deri në fundin e takimit.
Dhelprat në krahun tjetër luajtën për rreth më shumë se 25 minuta përfshirë edhe shtesat me një lojtar më pak pas daljes me karton të Chilwell, por nga superioriteti numerik nuk përfitoi dot Chelsea që me këtë barazim kapi përkohësisht Manchester United në vendin e dytë të renditjes në kuotën e 47 pikëve.
Në ndeshjet e tjera të javës së 23-të Crystal Palace mposhti 1-0 Burnley-in, West Bromwich fitoi 2-0 ndaj Brighton. West Ham kaloi lehtësisht 4-1 në transfertë Huddersfield ndërsa përfunduan në barazim 1-1 dhe 2-2 sfidat Newcastle-Swansea dhe Watford-Southampton.
