Disa përfaqësues të të përndjekurve politikë kanë protestuar sot para Ministrisë së Drejtësisë, pikërisht në kohën kur ministrja Etilda Gjonaj zhvilloi një takim me kreun e Autoritetit Kombëtar Italian të Anti-korrupsionit, Raffaele Cantone.
Ish-të përndjekurit kërkojnë shpërblimet e tyre për vitet e burgut, ndërsa paralajmëruan se do të nisin një grevë urie si ajo e vitit 2012.
Gjithashtu, ata nuk “kursyen” as ministren Gjonaj, për të cilën thanë se “rri si nuse e bukur dhe nuk i pret”, ndërsa kjo e fundit zgjodhi t’i shmangte sërish ish-të përndjekurit politikë, duke dalë nga dera tjetër e institucionit.
“Ajo rri aty si nusja e bukur dhe nuk na takon. Këta janë komunistë. Jam i burgosur politik dhe jemi rreth 60 vetë në protestë. Për ne që bëmë grevën e urisë nuk e vë njeri ujin në zjarr. Nuk kam marrë asnjë lek, kam bërë 5 vite burg. Do bëhemi gati për një grevë urie si në vitin 2012”, tha një nga ish-të përndjekurit.
