Pozicioni i Drejtorit të Përgjithshëm të Policisë së Shtetit është vakant dhe disa prej drejtorëve të policisë në rrethe e synojnë. Tashmë në vend të tij përkohësisht është zëvendës drejtori Rebani Jaupi. Në media kanë qarkulluar shumë propozime në lidhje me atë që do të zërë vendin e kryepolicit shqiptar, por asnjëri prej tyre nuk është konkretizuar.
Sigurisht që për këtë pozicion ka dhe kritere ligjore të forta që vetëm pak drejtues i plotësojnë. Një kriter i pa negociueshëm është grada “Drejtues i lartë” ose “Drejtues i parë”.
Mes gjithë emrave të përfolur i vetmi që përmbush kriteret për të qenë drejtues i policisë së shtetit është Gjovalin Loka, i cili aktualisht mban detyrën e Drejtorit të qarkut Shkodër.
Loka ka një eksperiencë të gjatë në strukturat e Policisë së Shtetit dhe mban gradën “Drejtues i Parë”. Më herët Loka ka mbajtur detyrën e drejtorit të Policisë në Lezhë dhe Vlorë. Ka mbajtur pozicionin e shefit të komisariatit numër 1 në Tiranë. Në vitin 2005, Loka largohet nga Policia e Shtetit për t’u rikthyer në 2013-ën ku emërohet Drejtor Rendi në Drejtorinë e Përgjithshme të Policisë së Shtetit. Nga prilli të vitit 2017, ai është emëruar drejtor i policisë së qarkut të Shkodrës, detyrë të cilën vijon ta kryejë.
Kriteret e emërimit të Drejtorit të Policisë së Shtetit:
1. Këshilli i Ministrave emëron Drejtor të Policisë së Shtetit, me propozim të ministrit përgjegjës, një nga punonjësit e policisë që mban gradën “Drejtues i lartë” ose “Drejtues i parë”.
2. Përveç kriterit të gradës, kandidati i propozuar për Drejtor të Policisë së Shtetit duhet të plotësojë kriteret si vijon:
a) të ketë vetëm shtetësinë shqiptare;
b) të ketë të paktën 15 vjet përvojë në polici, nga të cilat të paktën 10 vjet në pozita të larta drejtuese në strukturat e Policisë së Shtetit;
c) të ketë integritet dhe figurë të pastër morale;
ç) të mos ketë qenë i dënuar për vepër penale, me vendim të formës së prerë;
d) të mos ketë masa për shkelje të rënda disiplinore të policisë brenda 3 viteve të fundit;
dh) të mos ketë konflikt interesi në ushtrimin e detyrës;
3. Drejtori i Policisë së Shtetit qëndron në detyrë për një periudhë prej 5 vjetësh me të drejtë riemërimi edhe për një mandat tjetër.
