Visar Ymeri ka dhënë dorëheqje nga posti i kryetarit të Lëvizjes Vetëvendosje. Ymeri e ka bërë lajmin të ditur në një konferencë, e cila po zhvillohet aktualisht dhe që ka nisur në orën 15:00.
Dorëheqja e Ymerit vjen pas krizës që po kalon Lëvizja Vetëvendosje, teksa ka një përçarje mes anëtarëve të kësaj force.
“Dua t’u drejtohem të gjithë anëtarëve të Lëvizjes Vetëvendosje se që nga dita e sotme kam vendosur të tërhiqem nga të gjitha pozitat e mia drejtuese në Lëvizjen Vetëvendosje, pra nga pozita e kryetarit të lëvizjes, nga ajo e anëtarit të Kryesisë dhe nga pozita e anëtarit të Këshillit të Përgjithshëm të Lëvizjes Vetëvendosja. Më duhet ta them se ky është një nga vendimet më të vështira që e kam marrë ndonjëherë në jetë. Ka më shumë se një vit që po përballemi me një problem në rritje. Jemi përballur me një situatë sistematike të shpifjeve. Këtë metoda nuk e pëlqej dhe nuk e mbështes, është e padrejtë dhe e panevojshme”, tha ndër të tjera Ymeri.
