Lorenco Insigne është një ndër pikat kyçe tek ekipi i Napolit dhe po funksionon më së miri këtë sezon nën drejtimin e Maurizio Sarrit. Napoli ka treguar se është ekipi që luan një futboll mjaft të bukur edhe pse u eliminua nga Champions League dhe u mposht nga Juventus në Serie A. Për “Gazzetta dello Sport” ka folur Insigne, i cili ka thyer edhe tabunë e ‘tersit” tek napolitanët, duke folur për titullin kampion.
“Që i vogël ëndrra ime ka qenë të luaj në ‘San Paolo’ me fanellën e Napolit. Duke parë ecurinë e deritanishme mendoj se është viti i duhur për të fituar titullin. E them këtë, pasi sivjet po marrim pikë të plota në fusha ku një sezon më parë në rastin më të mirë dilnim me një barazim. Kampionati është i rëndësishëm, por edhe Liga e Kampioneve nuk ishte më pak”, shprhet fillimisht Insigne.
Për këtë betohet sulmuesi, i cili përgënjeshtron çdo hipotezë mbi shkaqet e eliminimit duke deklaruar: “Ka njerëz që thonë se eliminimi ishte një zgjedhje e skuadrës për tu përqendruar në kampionat. Titulli vërtetë ka shumë rëndësi, por të tilla aludime janë totalisht të rreme. Ndeshje e parë ndaj Shaktjorit komprometoi ecurinë tonë në “Champions”, ndoshta nuk e vlerësuam sa duhej atë takim.”
Nuk mund të mungonte një shpjegim për debatin me Higuain, në përballen e fundit kundra njëri tjetrit: “Thotë se është miku ynë, na dërgon mesazhe përpara ndeshjes pastaj na feston në fytyrë. Në “San Paolo” i thashë një dy fjalë në dialekt dhe besoj se më kuptoi… nuk duhet ti lejoje vetes që të të mungojë respekti ndaj nesh.”
