Mjekët ligjorë kanë përcaktuar shkakun e vdekjes së papritur të gazetares 31-vjeçare Adelajda Xhamani në një raport përfundimtar.
Mësohet se vdekja e ish-banores së Big Brother ka ardhur për shkak të infarktit kongjestiv në zemër, i shkaktuar nga një sëmundjeje të rrallë, e quajtur kardiomiopati, që prek muskulin e zemrës, duke dëmtuar strukturën apo funksionin e barkusheve dhe sjell dobësimin e zemrës.
Sipas mjekëve, kjo ka sjellë mosfunksionimin e zemrës dhe më pas vdekjen e 31- vjeçares.
Por, ata shtojnë se ka qenë mostrajtimi i sëmundjes ai që ka sjellë infarkt kongjestiv, që do të thotë dështim i plotë i muskulit të zemrës.
Nga ana tjetër, mjekët dyshojnë se kjo sëmundje mund të jetë gjenetike, por nuk përjashtojnë as mundësinë se kardiomiopatia në këtë rast mund të ketë qenë idiopatike, për vetë faktin se ajo nuk ishte diagnostikuar më parë.
Në këtë rast shkaqet e fillimit të sëmundjes janë thuajse të pamundura të përcaktohen me saktësi.
PERJASHTIMET
Po ashtu, mjekët ligjorë kanë përjashtuar disa faktorë si shkaktarë të vdekjes së saj, të tillë si komplikacion që varion nga epilepsia, siç u argumentua nga Policia një ditë pas vdekjes, nga dëshmia e një mikeshe të saj.
Nga ana tjetër, ata thanë se nuk kishin konstatuar të ketë pasur shenja dhune, bllokim të rrugëve të frymëmarrjes, shenja injeksioni apo të përdorimit të alkoolit para vdekjes.
Gazetarja 31-vjeçare Adelajda Xhamani ndërroi jetë papritur në orët e para të mëngjesit të datës 29 tetor të këtij viti, në apartamentin ku jetonte me qira, në rrugën “Muhamet Deliu”.
