Partizani ka arritur të marrë një fitore 2-1 përballë Teutës, në minutat e fundit. Por ajo që ka rënë më shumë në sy ka qenë mungesa në stol e sulmuesit shkodran, Xhevahir Sukaj. 30-vjeçari nuk ishte grumbulluar nga trajneri Sulejman Starova për këtë sfidë, ndërsa i pyetur nga gazetarët për sulmuesin, 61-vjeçari dha një përgjigje jo shumë bindëse.
“Sukaj? Ai është me grip më duket, kush e merr vesh çfarë ka?”, – u përgjigj tekniku Starova.
Shkodrani ka pasur debate të forta me drejtuesit e klubit që kanë ngritur shumë pikëpyetje për të ardhmen e tij. Burime të besueshme pranë lojtarit për EDS-në, bëjnë me dije se Sukaj ka shkëmbyer fjalë të rënda me kupolën drejtuese të klubit.
Këto debate kanë ardhur për shkak të bisedimeve që ka nisur shkodrani me drejtuesit e klubit të Tiranës, të cilën po e sheh si një alternativë mjaft të mirë pasi situata tek Partizani për të nuk është aspak e mirë. Bardheblutë janë gati për ta pritur sulmuesin shkodran.
E gjitha ka filluar kur drejtuesit e kuq kanë rënë në dijeni të këtyre bisedimeve dhe kanë kërkuar llogari, por shkodrani nuk ka lëshuar pe pasi njihet për karakterin e ashpër që ka. Palët janë të acaruara dhe rrugët e tyre mund të ndahen që në janar. Në këtë mes ndikojnë edhe relatat aspak të mira mes tij dhe trajnerit Starova.
