Todt ka qenë pjesëmarrës në përurimin e “Hollit të Famës” të FIA-s në Paris, ku edhe ka folur për revistën e njohur “Autosport”. Presidenti aktual i FIA-s nuk mund t’i shmangej fjalëve për Michael Schumacher, me të cilin ka fituar gjithçka gjatë viteve të kaluara së bashku te “kokëkuqja”.
Piloti gjerman pësoi një incident të rëndë teksa bënte ski në Alpet e Zvicrës në vitin 2013, e prej atëherë vijon të luftojë, por sipas raporteve më të fundit ka pasur vetëm një rikuperim të lehtë.
Emotiv dhe nostalgjik, Jean Todt shprehu gjithë admirimin e tij për kampionin gjerman në aspektin njerëzor. Michael është një njeri special, i tillë është edhe për botën e garave të shpejtësisë. Mbetet një mik i shtrenjtë, që sot vijon të luftojë për të rifituar gjendjen shëndetësore. Na mungon Michael, deklaroi presidenti Todt, i cili kujtoi edhe një episod tjetër që shihte si protagonist legjendën e Formula 1.
“Ishte sezoni 2001 dhe ai ishte kampioni në fuqi i Botës, por me shumë modesti më kërkoi që të kryente disa prova në pistën e Fioranos për të parë nëse ishte ende në gjendje të garonte. I tillë ishte Michael, modest dhe i përulur dhe gjithmonë me dyshimin nëse ishte një pilot i mirë, pa u vetëkënaqur asnjëherë, pa qenë kurrë arrogant!”, rrëfeu Todt.
