Ndërkombëtarët kanë kërkuar që deputetët e Kosovës të miratojnë versionin aktual të Demarkacionit.
Kështu, janë zyrtarë të zyrës së BE-së në Prishtinë, të Ambasadës së Francës dhe Norvegjisë ata që deklaruan se deputetët e Kuvendit të Kosovës duhet ta miratojnë versionin aktual të Demarkacionit, pasi marrëveshja e vitit 2015 e ruan kredibilitetin ndërkombëtar të Kosovës.
Sipas përfaqësuesve të huaj diplomatikë në Kosovë, marrëveshja e Demarkacionit është e saktë dhe duhet ratifikuar, edhe pse Komisioni i Ri për Shënjimin e Kufirit me Malin e Zi konstatoi se Kosova humb territor nga versioni aktual i Demarkacionit.
Jo vetëm kaq, por sipas ambasadorëve, komisionet e mëparshme (duke përfshirë edhe atë ndërkombëtar) kanë bërë një ekzaminim të përgjithshëm rreth kësaj marrëveshjeje që tregon për saktësinë e kësaj marrëveshjeje.
Ambasada e Francës në Kosovë ka thënë për “Zërin” se të dyja palët, edhe ajo e Kosovës, edhe ajo e Malit të Zi, ishin pajtuar që ta nënshkruanin Marrëveshjen e Demarkacionit para më shumë se dy vjetësh:
“Marrëveshja për Demarkacionin e Kufirit, e arritur në vitin 2015, ishte nënshkruar nga Qeveria e Malit të Zi dhe nga Qeveria e Kosovës. Të dyja palët u pajtuan kështu së bashku për të definuar vijën kufitare”, thuhet në përgjigjen e kësaj Ambasade.
Kështu, sipas zyrtarëve të saj, Marrëveshja e Demarkacionit mes dy shteteve duhet të miratohet.
“Kjo marrëveshje duhet të ratifikohet. Ajo ka të bëjë me kredibilitetin ndërkombëtar të Kosovës. Ajo është po ashtu një kusht i domosdoshëm që Kosova të ecë përpara drejt liberalizimit të vizave”, potencohet më tej.
Po ashtu, Ambasada e Norvegjisë në Kosovë ka deklaruar se marrëveshja në fjalë, e arritur në vitin 2015, është krejtësisht e saktë.
“Norvegjia beson se komisionet e mëparshme si në Kosovë, ashtu edhe në nivel ndërkombëtar, kanë bërë një ekzaminim gjithëpërfshirës, tërësor dhe objektiv të demarkacionit të kufirit midis Kosovës dhe Malit të Zi dhe beson se demarkacioni i përfunduar në marrëveshjen aktuale është e saktë”, thuhet në përgjigjen e Ambasadës Norvegjeze dhënë “Zërit”.
Me këtë rast, duke folur rreth vendimit të Qeverisë që ta dërgojë në Kuvend Marrëveshjen e Demarkacionit, Ambasada ka thënë se Norvegjia e përshëndet vendimin në fjalë.
“Norvegjia përshëndet vendimin për ta dërguar Marrëveshjen e Demarkacionit në Kuvend. Tani do të jetë në Kuvend që të marrë vendimin e saj. Me miratimin e marrëveshjes Kuvendi do ta lehtësojë integrimin e mëtejshëm të Kosovës në bashkëpunimin evropian”, theksohet në përgjigje.
Edhe Zyra e Bashkimit Evropian në Kosovë (BE), ka kërkuar që Kosova ta gjejë një zgjidhje sa i përket marrëveshjes së demarkacionit.
“Është thelbësore që Kosova ta gjejë zgjidhjen më të mirë për zhbllokimin aktual të demarkacionit përmes një debati të përfaqësuesve të zgjedhur dhe një vote e cila jep mbi bazën e pritjeve legjitime të popullit të Kosovës dhe të ardhmes së tyre evropiane”, thuhet në përgjigjen e zyrës së BE-së dhënë “Zërit”.
Ndërkaq, gjatë ditës së djeshme Komisioni i Ri Shtetëror, në krye me Shpejtim Bulliqin, duke prezantuar raportin përfundimtar para Qeverisë konstatoi se ish-Komisioni (i drejtuar nga Murat Meha) ka zhvendosur vijën kufitare mes Kosovës e Malit të Zi.
