Policia e Maqedonisë ka sekuestruar një sasi të madhe droge “Capdagon” në fshatin Reçicë të Vogël në Tetovë. Ka qenë një aksion mirë i planifikuar dhe i realizuar në koordinim me policinë amerikane anti-drogë DEA dhe atë serbe. Janë arrestuar 4 shtetas të Maqedonisë dhe 5 të Serbisë. Në laboratorin e zbuluar në Tetovë janë zbuluar 125 kilogram drogë sintetike, ose minimum 500 mijë tableta që kapin vlerën prej 2,5 milionë eurosh. Gjatë muajve të fundit hetuesit në të gjithë Evropën kanë kapur mijëra pilula “Captagon”, një ilaç me bazë amfetaminës që është popullor te grupi militant i Shtetit Islamik (ISIS).
I quajtur “droga xhihadiste”, “Captagon” i mban përdoruesit të zgjuar për periudha të gjata kohore, mënjanon dhimbjen dhe krijon një ndjenjë euforie.
Sipas një ish-luftëtari në Siri, i cili foli për CNN në vitin 2014, “ISIS na dha drogë, pilula halucinacionike që bën të luftoni duke mos mbajtur llogari nëse do të jetoni ose vdisni.”
Duke pasur parasysh dëshminë e ngjashme nga luftëtarë të tjerë, ekspertët thonë se ka të ngjarë që pilulat që militanti mori të ishin Captagon. Ministri i Punëve të Brendshme Oliver Spasovski njoftoi se sasia e drogës ka pasur destinacion Turqinë.
Në mesin e të arrestuarve, pjesëmarrës në shitjen e drogës sintetike në laboratorin e Tetovës ishte edhe Milan Zarubica shtetas i Serbisë. Ai më herët ishte dënuar për organizimin e prodhimit të drogës sintetike, përsëri për shkak të veprimit të njëjtë është arrestuar në Maqedoni.
Zarubica dhe grupi i tij i atëhershëm i bashkëpunëtorëve për herë të parë u burgosën më 4 shkurt 2003 me dyshimin se kishin ngritur fabrikën më të madhe për prodhimin e drogës sintetike në Evropë. Atëherë u konfiskuan rreth dy milionë tableta amfetaminë dhe substanca të ndryshme me vlerë prej 10 milionë dollarësh.
Aksioni i atëhershëm i koduar me emrin “Beograd” u krye kur nga Agjencia amerikane për luftë kundër drogës (DEA) erdhi informacioni se në afërsi të kryeqytetit serb, në Stara Pazovë, ekziston një laborator i madh për prodhimin e drogës sintetike. Por ende mbetet mister se si ka qëndruar në Tetovë, mbreti serb dhe kryemafiozi i drogës, Zarubica. MPB pritet të jap edhe detaje të tjera që kanë të bëjnë me këtë rast të prodhimit të trafikimit ndërkombëtarë të drogës.
