Ashtu siç ishte parashikuar, moti është përkeqësuar ditën e sotme, duke shkaktuar probleme në qarkullim, por edhe në lundrim.
Kështu, në portin e Durrësit është pezulluar cdo aktivitet, pasi sipas Kapitenerisë, forca e detit arrin deri në gjashtë ballë në gji dhe tetë në det të hapur.
Po ashtu, pezullohet edhe lundrimi i tragetit në Vlorë për tre ditët në vijim. Mësohet se trageti i linjës Vlorë-Brindizi është larguar prej ditës së mërkurë drejt Italisë, ndërsa deri të hënën nuk do të kryejë itenerarin e parashikuar, pikërisht për shkak të situates së rënduar nga moti i keq i këtyre ditëve.
Moti i keq ka dhënë efektet e para edhe në aksin rrugor Elbasan-Librazhd, ku ka pasur rrëshqitje gurësh.
Instituti i Gjeoshkencave, Energjisë, Ujit dhe Mjedisit ka publikuar edhe buletinin më të fundit të rreziqeve natyrore, teksa njofton për reshje intensive dhe përmbytje në shumë qytete, teksa të vetmet qarqe ku niveli i rrezikut është i moderuar, janë Tirana dhe Durrësi, ndërsa të gjitha qarqet e tjera kanë nivel të lartë rreziku sa i përket përmbytjeve.
