Kombëtarja shqiptare e femrave është mposhtur me rezultatin e thellë 5-1 nga Zvicra, ku për helvetët ka shënuar dy herë vajza me orgjinë shqiptare Florjana Ismaili. Kombëtarja Shqiptare e femrave është në vendin e fundit në grup, pasi ka zhvilluar 5 takime, të cilat i ka humbur të gjitha. Vlen të theksohet, se shqiptaret kanë shënuar vetëm 3 gola, ndërsa e kanë nxjerrë topin nga rrjeta e tyre plot 19 herë.
Sfida u zhbllokua që në minutën e 8-të, nga një zvicerane me origjinë shqiptare, Florjana Ismaili. Më pas në të 29-tën, ishte Krasniqi që barazoi për vajzat shqiptare. Por, pjesa e parë nuk përfundoi me kaq, pasi helvetet shënuan edhe një herë në të 35-tën, me Bahman.
Më pas, në të dytën, Zvicra shënoi edhe tri herë të tjera, për të mbyllur krejt takimin, me shifrat 5-1. Vajzat e Armir Grimës, nuk kanë marrë ende pikën e parë, duke vazhduar kështu “zakonin” e humbjeve, dhe duke dhuruar paraqitje zhgënjyese.
