Kupa e Pavarësisë e cila u organizua në qytetin e Korçës është fituar nga ekipi i Strugës, të cilët mposhtën në finale Otrant Ulqinin, pas goditjes së penalltive. Struganët zëvendësuan në këtë turne Shkëndijën e Tetovës të cilët u tërhoqën nga gara pasi janë në pozita të mira për të fituar titullin kampion. Ekipi i vendlindjes së Nijas Lenës, një prej “yjeve” të kampionatit shqiptar kaloi Tiranën 1-0, ndërsa Otrant fitoi 2-1 me Lirinë e Prizrenit. Dy finalistet ishin të avantazhuara sepse rivalët nuk u paraqitën me ekipet më të mira prej angazhimeve në kupë dhe kampionat.
Edhe pse luajti në inferioritet numerik në pjesën më të madhe të finales 45-minutëshe, ekipi strugan arriti të mos pësonte gol, edhe pse kundërshtarët nga Ulqini kishin dy shanse shumë të mira për të shënuar. Me suksesin 4-1 pas penalltive Struga u shpall fituese e trofeut Pavarësia. Liria ishte ekipi “Fair Play” i turneut, ndërsa Altin Loga i Strugës u shpall “Lojtari më i Mirë”.
