Projektligji i ri për statistikat zyrtare ka parashikuar dënime të rënda administrative ndaj personave që raportojnë të dhëna tek institucionet ndërkombëtare. Kjo vjen si nevojë për të rritur cilësinë dhe kredibilitetin e të dhënave ndërkombëtare.
Aktualisht ky projektligj është në fazën e konsultimit publik, por që pritet së shpejti të miratohet nga qeveria. “Për rastet e dërgimit të të dhënave zyrtare institucioneve ndërkombëtare pa njoftimin e INSTAT-it, dënohet me gjobë deri në 50 000 lekë”, parashikohet nga projektligji.
Gjithashtu në rastet se përsëritet një gjë e tillë, gjobat janë nga 50 000 deri në 250 000 lekë për çdo shkelje. Bëhet e ditur se për shkeljet e kryera nga institucionet publike gjoba i jepet titullarit të intitucionit.
Gjoba do të ketë edhe për personat që japin të dhëna konfidenciale ndaj të tretëve për qëllime kërkimore. “Moszbatimi ose shkelja e kërkesave të konfidencialitetit nga nëpunësi, përfshirë këtu dhe kohë kur ai ka lënë detyrën, ose nga një palë e tretë, së cilës i është dhënë e drejta për qëllime kërkimore, dënohet me gjobë nga 200 000 lekë deri në 300 000 lekë”, përcaktohet në projektligj, shkruan “Monitor”.
Edhe për personat që pengojnë transmetimin e të dhënave që rrjedhin si detyrim nga ligji, parashikohet të ketë gjoba nga 50 000 lekë. Ndërkohë për rastet e përsëritura, gjobat janë nga 50 000 lekë deri në 250 000 lekë për çdo shkelje.Për shkeljet e kryera nga institucionet publike, gjoba i vendoset titullarit të institucionit.
Kur të dhënat ose informacioni duhen dërguar në INSTAT, projektligji i ri i jep të drejtën e vendosjes së gjobave drejtorit të Përgjithshëm. Po të drejtën për vendosjen e gjobave e ka edhe drejtuesi i agjencisë statistikore, kur të dhënat janë kërkuar nga agjencia statistikore përkatëse.
Ndërsa ata që kanë kundërshtime ndaj gjobës së marrë, mund të bëhjnë ankim te drejtori i Përgjithshëm brenda 10 ditëve nga data e shpalljes ose e botimit të gjobës, i cili duhet të përgjigjet brenda 30 ditëve.
Edhe nëse ka kundërshtime ndaj vendimit të drejtorit të Përgjithshëm ose kur ai nuk përgjigjet, personi i interesuar mund t’i drejtohet gjykatës brenda 30 ditëve nga data e shpalljes s vendimit ose nga mospërgjigjja.
