Në kampionatin botërorë të arteve marciale MMA, që u zhvillua në Bahrein kanë fituar dy medalje bronzi edhe dy shqiptarë. Florian Doskja dhe Ermal Hadribeaj kanë arritur të prekin gjysmëfinalet dhe kanë siguruar medaljet e bronzit, në kategorinë e arteve marciale mikse. Ermal Hadribeaj, në peshën deri në 70 kg, arriti në gjysmëfinale pas tre fitoresh. Ai mundi në ndeshjen e parë finlandezin Holapa, në të dytën sportistin nga Bahreini, Fikej dhe rivalin tjeter, çekun Tihota, ndërkohë në gjysëmfinale u mund me pikë nga amerikani Keathin Thomas.
Florian Doskja, për peshën 61 kg, pati rezultate edhe më spektakolare. Ai mundi në ndeshjen e parë italianin Alessandro Celadi, në të dytën kaloi britanikun Ben Miles, ndërsa në çerekfinale ia doli kundër brazilianit Karlos Veras. Pas një ndeshjeje të fortë, ai u mund me pikë në gjysmëfinale nga sportisti rus Gamzat Magomedov.
Doskja ka një karrierë të rëndësishme pasi ka fituar 7 ndeshje dhe ka humbur vetëm 2 deri tani në këtë kategori. Ai është numri 1 në Europë në këtë kategori peshe dhe i treti në Lindjen e Mesme.
