Ka përfunduar ekspertiza për Fadil Kasemin, i akuzuar për vrasjen e bashkëshortes së tij, gjyqtares Fildez Hafizi. Bëhet e ditur se ekspertiza mjeko-ligjore ka dalë në përfundimin se 53-vjeçari është i aftë mendërisht.
Ndërkohë kujtojmë se ngjarja ndodhi pak muaj më parë në zonën e xhamllikut në Tiranë dhe që prej asaj kohe tregtari 53-vjeçar nuk ka pranuar të japë shpjegime përpara grupit hetimor për motivet e vrasjes së ish-bashkëshortes, gjyqtares Fildeze Hafizi me të cilën ishte divorcuar dy vjet më parë.
Policia dhe Prokuroria kanë zbardhur dinamikën e ngjarjes dhe kanë raportuar se 53-vjeçari ka pritur që ish-bashkëshortja të hipte në makinën e saj dhe i është afruar teksa ka qenë duke vendosur rripin e sigurimit.
“Xhami i mjetit ka qenë gjysmë i hapur, ndërsa Fadil Kasemi ka qenë 10 metra pas automjetit. Ai është afruar me shpejtësi pa pasur asnjë komunikim me ish-gruan. Mbi të pandehurin rëndon akuza e vrasjes për shkak të marrëdhënieve familjare, akuzë për të cilën rrezikon burgimin e përjetshëm”, njofton policia.
