Gjatë 9 mujorit të parë të këtij viti të ardhurat në buxhetin e shtetit kanë qenë më të larta, ku kanë kontribuar më së shumti të ardhurat nga akciza.
Sipas statistikave të Ministrisë së Financave, të ardhurat nga akciza janë realizuar në vlerën 33.9 miliard lekë, 9.5% ose 2.9 miliard lekë më shumë se 9 mujori i vitit 2016 dhe rreth 10 milion lekë më shumë se plani.
Por, cili grup ka ndikuar më së shumti në mbledhjen e këtyre të ardhurave?
Importi dhe prodhimi vendas i karburanteve ka pasur një ndikim të madh, që rezultoi rreth 422 mijë ton, me një rritje prej 40,040 ton ose + 10.5% krahasuar me 9 mujorin e vitit 2016. Gjithashtu rritje kanë shënuar, importi i Gazit të Lëngët me 24.1%, importi dhe prodhimi i birrës me 13.7%, importi i pijeve energjike me 15.5%, Importi dhe prodhimi i verës me 15.8%, dhe importi i cigareve me 3.7%.
Nga ana tjetër, importi i kafes ka shënuar një rënie prej 0.6% krahasuar me Janar- shtator 2016 ndërkohë që është rritur deklarimi i prodhimit vendas të duhanit nga 0.7 ton në 7.5 ton të deklaruara në periudhën Janar- Shtator 2017, raporton Scan TV.
Të ardhurat nga taksa e akcizës në vitin që lamë pas shënuan një mosrealizim të ndjeshëm. Ndërkohë që në fillim të këtij viti qeveria përfshiu për herë të parë në sistemin e akcizës edhe gazin e lëngshëm, si një mundësi për të rregulluar tregun, por pse jo edhe për të rritur të ardhurat në buxhet.
