Conor McGregor nuk është i bindur nëse ia vlen që ai të rikthehet sërish në kafaz për tu përballur me Tony Ferguson. Kjo vjen pasi ai pati fitime kolosale nga përballja me Mayweather, ndërsa nga përballja me amerikanin financat janë shumë të ulëta. Por kjo është një nga duelet më të kërkuara nga sportdashësit, por tashmë nuk është e sigurt nëse do ta shohim sërish.
“Unë vij nga një sfidë si ajo ndaj Mayweather, ku pata mbi 5 milionë PPV (pay per view-paguaj për ta parë), ndërsa sfida e Ferguson pati vetëm 100 mijë të tilla. Nga dueli me Mayweather, unë fitova mbi 100 milionë dollarë, ndërsa ai, nga dueli me Kevin Lee, mori vetëm 678 mijë dollarë. Më thoni, a mund të krahasohen këto shifra?”, u shpreh sot për mediat Conor McGregor.
Këto shifra të rivalit të tij nuk bindin aspak irlandezin që të zhvillojë këtë sfidë me Ferguson, duke u shprehur: “Nuk më motivon aspak kjo sfidë. Termat financiarë mes nesh janë shuma larg. Për momentin, ne jemi ende në bisedime dhe ky është një proces që mund të zgjasë. Është e vështirë që kjo përballje të më motivojë kaq shumë sa të dueloj në kafaz me të, megjithatë unë do ta mbroj titullin. A mund të më bindin njerëzit e rivalit të ri? Absolutisht që jo”, u shpreh Conor McGregor, që nuk duelon në kafaz që prej nëntorit 2016, kur mposhti Eddie Alvarez. Mediat amerikane parashikojnë një përballje mes McGregor dhe Ferguson në UFC-219, që do të zhvillohet më 30 dhjetor, në Las Vegas.
