Kosova i është bashkangjitur rrjetit më të madh të fondeve të filmit në Ballkan, SEE Cinema Network.
Ditën e sotme është mbajtur Asambleja e Përgjithshme e South Eastern Europe CINEMA NETWORK, ku i janë hapur dyert edhe Kosovës përmes Qendrës Kinematografike të Kosovës.
SEE Cinema Netëork u themelua në vitin 2000 dhe është rrjet i shteteve të Evropës Juglindore që synon zhvillimin e bashkëpunimit mes profesionistëve të filmit dhe shteteve anëtare të saj duke mbështetur zhvillimin e koproduksioneve ndërkombëtare dhe prodhimin e filmave të shkurtër, me qëllim promovimin dhe zhvillimin e industrisë filmike kombëtare të secilit vend pjesëmarrës për të forcuar bashkëpunimin dypalësh dhe shumëpalësh me anëtarët e rrjetit.
Kreu i Qendrës Kinematografike të Kosovës, Arben Zharku u shpreh se anëtarësimi në SEE është shumë i rëndësishëm për kinematografinë, pasi është një pikënisje e anëtarësimeve që Kosova t’i bashkëngjitet fondit evropian më të madh të bashkëprodhimit Eurimages.
“Anëtarësimi në SEE përveç që krijon mundësi të barabarta të projektet filmike kosovare me projektet e rajonit, gjithashtu krijon lidhje të fuqishme mes filmbërësve tanë dhe atyre nga rajoni. Ky anëtarësim shumë i rëndësishëm për kinematografinë tonë është pikënisje e anëtarësimeve me shpresën që Kosova t’i bashkëngjitet fondit evropian më të madh të bashkëprodhimit – Eurimages. Gjithashtu falënderojmë të gjitha vendet e rajonit për përkrahjen dhe krijimin e mundësive të reja për filmbërësit kosovar”, shprehet Zharku.
Shtetet anëtare në SEE janë Greqia, Serbia, Qipro, Rumania, Shqipëria, Maqedonia, Bulgaria, Sllovenia, Kroacia dhe sot bashkë me Kosovën u anëtarësua edhe Mali i Zi.
