Dialogu mes Kosovës dhe Serbisë duhet të vazhdojë me hapa më të shpejtë! Kështu është shprehur zëvendës ndihmës sekretari i Amerikës, Hoyt Brian Yee, i cili ka këshilluar të dy vendet që të vazhdojnë dialogun në hapa me të shpejtë.
Megjithatë, sipas tij janë Kosova dhe Serbia ato që vendosin:
“Ka filluar një dialog i brendshëm në Serbi, por duhet të zhvillohet edhe dialogu ndërmjet Kosovës dhe Serbisë më shpejt seç është tani. Kjo është vetëm këshillë, pasi përsëri dy shtetet vendosin”, deklaroi Yee.
Po ashtu, zyrtari i lartë amerikan u pyet nga një gazetar i “Zërit të Amerikës” për deklaratën e tij se “Serbia nuk mund të ulet në dy karrige”, ku Yee sqaroi këtë deklaratë duke thënë se kjo ishte një këshillë e tij dhe jo një ultimatum:
“Thënia ime ishte që Serbia të shkojë sa më shpejt drejt BE-së. Nuk ishte ultimatum, as paralajmërim. Tema ishte se si shteti serb duhet të ecë drejt Bashkimit Evropian dhe unë i dhashë disa këshilla”, tha Hoyt Yee.
