Një ngjarje e rëndë ka ndodhur në një kishë në jug të Teksasit, gjatë meshës së të dielës, ku janë qëlluar dhjetëra persona.
Të paktën 27 persona kanë humbur jetën pas sulmit të armatosur në një kishë në Wilson County, në Texas.
Burime nga policia kanë konfirmuar se deri më tani të paktën 27 persona kanë vdekur, ndërsa raportohet për dhjetëra të plagosur.
Filiali i FBI-së në San Antonio tha se agjentët e saj po hetojnë për zbardhjen e ngjarjes, ndërsa raportojnë se është qëlluar vetëm me një armë, por po shqyrtohen edhe mundësi të tjera.
Sipas medieve lokale, një person i armatosur hyri në kishë teksa zhvillohej mesha e së dielës, duke qëlluar me armë në drejtim të njerëzve, ndërsa më pas autori i sulmit është vrarë nga policia.
Fqinjët në zonë thanë se kanë dëgjuar disa të shtëna, ndërsa një tjetër dëshmitar në skenë tha se një dy vjeçar u qëllua gjithashtu në sulmin.
Të paktën gjashtë helikopterë kanë mbërritur në vendngjarje për të transportuar të lënduarit në spital.
Edhe presidenti i SHBA-së, Donald Trump ka reaguar në Twitter lidhur me sulmin. “Zoti qoftë me njerëzit e Sutherland Springs, Texas. Unë po monitoroj situatën nga Japonia”, shkruan ndër të tjera Trump.
