Qindra dhe mijëra maltezë të zakonshëm i dhanë sot lamtumirën e fundit gazetares investigative Daphne Caruana Galizia. Asnjë politikan nuk mori pjesë në varrim pas thirrjes së familjarëve ndaj tyre për të mos qenë të pranishëm.
Presidenti maltez Marie Louise Coleiro Preca, kryeministri Joseph Muscat dhe lideri i opozitës, Adrian Delia u lanë jashtë nga familjarët e gazetares. Kërkesa e familjarëve për t’i lënë të qetë në varrimin e të afërmes së tyre lidhet me faktin se gazetarja Daphne Caruana Galizia u vra pas investigimeve që kreu ndaj pushtetarëve të lidhur me paratë e pista të depozituara në ishujt off-shore, siç ishte dhe rasti i “Panama Papers”.
Policia mbylli rrugët nëpër të cilat kalonte kortezhi dhe që kryesohej nga kryepeshkopi maltez Charles Scicluna drejt kishës së “Rotunda të Musta”, jo larg fshatit Bidnija, ku gazetarja Galizia u vra në një atentat me bombë në makinën e saj në 16 tetorin e këtij viti.
Ndërkaq, kreu i komisionit parlamentar anti-mafia të Italisë, Rosy Bindi, akuzoi qeverinë malteze se nuk ka bërë asgjë për të goditur krimin e organizuar. Ndërsa Malta vijon të mbetet një det i hapur dhe tërheqës për kriminelët.
Deri më tani nuk është arrestuar askush për vrasjen e gazetares. FBI dhe Europol po ndihmojnë policinë malteze, ndërsa ekspertët holandezë kanë dhënë ndihmën e tyre në gjetjen e të dhënave nga provat mjeko-ligjore të nxjerra nga vendi i ngjarjes, vetëm qindra metra nga shtëpia Caruana Galizia.
Sipas policisë, hetimi është përqendruar tek kriminelët e përfshirë në kontrabandën e naftës mes të Maltës dhe Libisë, ku larja e hesapeve midis klaneve bëhet me anë të atentateve me bombë.
Në predikimin e tij, kryepeshkopi Scicluna tha se “Maltës i nevojiten gazetarë të pavarur, të ndershëm, të sigurt dhe të mbrojtur”. Ndërsa shtoi se “Kushdo që në një mënyrë apo në një tjetër ka marrë pjesë në vrasjen e Daphne-it, kam për detyrë t’ju them: Sado që të përpiqeni t’i shmangeni drejtësisë së njerëzve, nuk do të shpëtoni kurrë nga ajo e Perëndisë”.
Blogerja Galizia, postimet e së cilës tërhiqnin më shumë lexues sesa gjithë gazetat e vendit, u përshkrua kohët e fundit si “WikiLeaksi-grua”. Shkrimet e saj thumbonin botën e krimit që mbizotëron në shtetin më të vogël të Evropës.
Postimet e saj të fundit e vendosën gishtin te kryeministri i Maltës, Joseph Muskat dhe dy ndihmësit e tij më të afërt, që lidhin kompanitë off-shore me shitjen e pasaportave dhe pagesave malteze nga qeveria e Azerbajxhanit. TIRANA TODAY
