Një futbollist maqedonas ka humbur jetën mbrëmjen e sotme, pasi është qëlluar disa herë me armë zjarri në pjesën e qafës dhe të kokës. Viktima është Martin Janushev dhe ngjarja ka ndodhur në Shkup në lagjen Aerodrom, në rrugën “Vladimir Komarov”. Disa kalimtarë të rastit kanë marrë viktimën në një mjet privat dhe e kanë dërguar në klinikën e specializuar për ndërhyrje kirurgjikale “Shën Naumi i Ohrit”, por ka mbërritur i pajetë.
Është vet klinika që ka njoftuar përmes një deklarate se, personi i qëlluar mbrëmjen e sotme ishte dërguar i pajetë në institucionin shëndetësor. “Edhe krahas përpjekjeve të mjekëve për ta risjellë në jetë, pas 40 minutash është konstatuar vdekja e tij”, thuhet në komunikatë.
Ekipet policore kishin arritur në vendin e ngjarjes. Autori është në arrati, ndërsa armën e ka lënë në vendin e ngjarjes. Kjo ngjarje terrorizuese ka rritur shqetësimin e banorëve të lagjes Aerodrom në Shkup. Ndërsa MPB theksoi se do të jap detaje lidhur me motivet e këtij sulmi.
Por disa portale kanë theksuar se autori njihet se kush është dhe se bëhet fjalë për një person me dosje kriminale, dhe që kohë më parë ishte liruar nga burgu. Ai së fundi shoqërohej edhe me Janushev. Siç mësohet Janushev ishte edhe vëllai i komandantit të njësitit policor Alfa.
