Presidenti i Komisionit Evropian, Jean Claude Junker theksoi sot se katalanasit nuk janë nën represionin e Spanjës dhe se situata në të cilën ata qëndrojnë, nuk mund të krahasohet me atë të ish-Jugosllavisë.
“Në Kataloni nuk ka probleme me shkeljen e të drejtave të njeriut, sepse katalanasit, të cilët janë të dashur për mua dhe kulturën e të cilëve unë respektoj, nuk janë nën represionin e Spanjës. Nuk mund të ketë paralelizëm me Slloveninë dhe vendet e tjera të ish-Jugosllavisë, me atë që po ndodh në Kataloni”, tha Junker për televizionin portugez RTP.
Në fillimin e këtij muaji Katalonja mbajti referendumin për pavarësinë e saj, ku katalanasit votuan masivisht pro shkëputjes nga Spanja. Por, referendumi u shoqërua me dhunë dhe Madridi zyrtar nuk e njohu rezultatin. Ndërsa referendumi u argumentua nga autoritetet vendore si ushtrim si së drejtës për vetëvendosje.
