Mbrëmja e sotme do të dhurojë një përballje spektakolare dhe tejet të dyluftuar, për shkak të rivalitetit të vjetër midis dy skuadrave, ku Marseja do të presë Parisin në “Velodrome” në ndeshjen e vlefshme për Ligue 1.
Megjithatë, jo rastësisht kjo ndeshje merr një vëmendje të jashtëzakonshme për shqiptarët, pikërisht sot, pasi në orën 21:00 të mbrëmjes do të jetë pikërisht kapiteni legjendar i kuqezinjve, Lorik Cana, ai që do të shkelmojë topin e parë përpara nisjes së takimit.
Gjakovari Cana kujtojmë ka qenë pjesë e të dyja skuadrave, fillimisht te PSG-ja e më pas tek ekipi i kërkuar gjithmonë prej tij, Marseja.
Kjo do të jetë gjithashtu një gjest mirënjohjeje dhe ceremoni lamtumirë për ish-kapitenin e tyre, futbollistin ikonë të Kombëtares shqiptare, i cili luajti ndeshjen e fundit në karrierë pikërisht në Francë, gjatë Europianit 2016, ndërsa lamtumirën zyrtare në Shqipëri e dha ditën e ndeshjes mes Italisë dhe kuqezinjve në “Loro Boriçi.
