Deklarata mjaft të forta ka lëshuar presidenti i klubit të Flamurtarit para startit të sfidës përballë Kamzës. Sinan Idrizi ka deklaruar se një erë e re do të fillojë nga marsi për futbollin shqiptarë dhe atëherë do të jemi të gjithë të lumtur. Ka vazhduar akuza ndaj arbitrave për njëanshmëri në ndeshjet e vlonjateve dhe se është e kotë të vazhdojmë të ankohemi në FSHF pasi nuk na dëgjon njeri. Është zhvilluar edhe protesta e paralajmëruar ku në fillim të ndeshjes janë vendosur disa këngë pikante.
A do zhvillohet protesta që ishte deklaruar gjatë javës?
“Protesta ka filluar. Në sfond keni këngën nga Pink Floid, pjesa nga albumi Kafshët, më pas do keni edhe këngën Pigs(derrat).”
Çfarë marrëdhënie keni me FSHF dhe cilat janë përgjegjësitë tuaja në këtë situatë?
“Marrëdhënia jonë me FSHF nuk ia vlen të diskutohet. Është e kaluar, histori e kotë dhe e tepërt. Zëri ynë nuk dëgjohet dhe nuk ia vlen të flasim.”
Klubi i Flamurtarit nuk ka shkëlqyer në menaxhimin tuaj.
“Absolutisht që po. Unë nuk shmangem nga përgjegjësitë e mia. Pjesa kryesore e dështimit këto vitet e fundit më takon mua. Por ata që menaxhojnë futbollin këtu, janë bërë si Napoleoni tek “Ferma e Kafshëve”.
Çfarë doni të thoni kur deklaroni se do durojmë deri në muajin mars?
“Nuk do të jetë më Shqipëria e atyre që bëjnë kontrabadë. Do fryjë një erë e re. I kam bërë thirrje prokurorisë së Janinës se Armando Duka ka kaluar kufirin në mënyrë të paligjshme. I ka ikur koha atyre që mbretërojnë këtu. Pas marsit, koha do ndryshojë.”
Do të kandidoni si president i FSHF?
“Jo. Nuk e kam ndërmend.”
Po fitoni pak sfond politik. Edhe Partizani po ankohet për politikën.
“Unë investoj miliona euro dhe askush nga FSHF nuk vjen të na përgëzojë. Arbitrat që kanë ndeshjet Flamurtarit janë të gjithë të qërruar. Nuk mund të fyhet një qytet kështu. Gara nuk duhet të prishet kështu.”
Çfarë të mirë ka Flamurtari i këtij sezoni?
“Do të thuash që kanë marrë rrogat?! Kanë diçka më tepër në fushë.”
Jeni i kënaqur me lojën, cilin lojtar preferoni?
“Unë jam tifoz, nuk bëj analizën. Jam i kënaqur me ekipin dhe shpresoj të jemi në 3 ekipet e para të Superligës.”
