Romani “Prilli i Thyer” i Ismail Kadaresë është shndërruar në një shfaqje teatrale në Brazil.
Shfaqja “Armiku”, e bazuar në tekstin e romanit të Kadaresë është shfaqur disa herë këtë muaj në teatrin Shed Arthur Netto, në Brazil.
Aktori kryesor i kësaj shfaqjeje është Manoel Mesquita Junior, ndërsa tregon edhe zhvillimet e Kanunit në një shoqëri shqiptare të viteve 30-të.
“Është interesante se si, pa e kuptuar fare, shpesh shkojmë drejt mosmarrëveshjes. Edhe pse një botë e tërë flet për dashurinë, tolerancën e vëllazërinë, veprimet janë gjithmonë të rregulluara instinktivisht drejt problemeve e mosmarrëveshjeve”, tregon aktori kryesor i shfaqjes “Inimigo” (Armiku), shkruan KultPlus.
“Prilli i thyer” është një nga romanet më të shquara të shkrimtarit shqiptar me famë botërore Ismail Kadare. I publikuar së pari në vitin 1980 në përmbledhjen “Gjakftohtësia”, ky libër që për temë ka besën, gjakmarrjen dhe kanunin në krahinat malore të Shqipërisë Veriore, është përkthyer dhe botuar në dhjetëra gjuhë.
Personazhi kryesor, Gjorgu, detyrohet të hakmerret për shkak se këtë e kërkon Kanuni i pashkruar që është përdorur me shekuj në vendin ku ai jeton.
Në Brazil ky libër është kthyer edhe në film dhe mori titullin “Prapa Diellit”.
