Autoriteti Rrugor Shqiptar në bashkëpunim me Inspektoratit Kombëtar të Mbrojtjes së Territorit dhe Policinë e Shtetit kanë nisur punën në terren për pastrimin e nyjeve dhe akseve kombëtare.
Ata zbritën sot në terren, konkretisht në zonën e Shkozetit dhe filluan zbatimin e planit të masave, urdhëruar nga ministrat Gjiknuri dhe Xhafaj.
“Sot ka filluar pastrimi i të gjitha akseve kombëtare nga ndërtimet e paligjshme të cilat bëhen shkak për burime aksidentesh. Aksi parë që kemi zgjedhur për të filluar është Tiranë-Rrogozhinë që vazhdon pastaj deri në Vlorë. Puna ndërmjet të dy institucioneve ka filluar prej ditësh. Paralelisht po punohet në të gjithë Republikën e Shqipërisë për të bërë njoftimet përkatëse dhe procedurat ligjore. Aksi që do pasojë do jetë aksi Tiranë-Shkodër-Hani Hotit”, u shpreh drejtoresha e IKMT, Dallëndyshe Bici.
Drejtori i Autoritetit Rrugor Shqiptar Afrim Qendror deklaroi të dhëna të tjera për veprimet që do të kryhen në terren:
“Aksioni ka nisur në një rreth rrotullim, në një mbikalim. Toka dhe sipërfaqet e tokave poshtë nënkalimeve janë sipërfaqe të shpronësuara nga shteti dhe aktiviteti këtu është i paligjshëm, në një kohë që është burim aksidenti sepse të gjitha makinat që hyjnë dhe dalin hyjnë në nënkalim.
Gjithashtu dua t’iu bëj me dije që përveç objekteve të biznesit kisoka, tabela, të gjitha llojet e aktiviteteve që janë në kundërshtim me Kodin Rrugor, të gjitha këto do të hiqen nga akset rrugore.
Një rëndësi të veçantë dhe një njoftim dua të bëj për të gjithë njësi tregtare të karburanteve, sepse në të gjitha karburantet ne kemi tabela vertikale të vendosura në anë të rrugës në kundërshtim me Kodin Rregullor. Do të lajmërohen të gjitha karburantet për t’i hequr këto lloj tabelash për t’i vendosur në funksion dhe në zbatim të Kodit Rrugor, pasi kështu siç janë shmangin vëmendjen e drejtuesve të mjeteve. Të gjitha karburantet që përdorin natën prozhektorë jashtë standardeve të rrugës duhet t’i heqin, në të kundërt në bashkëpunim me Inspektoriatin Ndërtimor dhe me Policinë e Shtetit ne do t’i heqim të gjitha”, theksoi Qendro.
