Europa League do të sjellë për herë të parë në Shqipëri edhe përdorimin e teknologjisë ’Gol Line’, në ndeshjen që do të zhvillojë Skënderbeu përballë Yong Boys në ‘Elbasan Arena’.
Goal Line Technology është një sistem që përdoret në fazën finale të turneve madhorë për klube të organizuar nga UEFA dhe që deri më tani është shfrytëzuar në ligat më të mëdha në kontinent, nga Seria A, në Premier League, Bundesliga dhe Ligue 1.
Për Skënderbeun, teknologjia e vijës së portës është ajo e “Syrit të Fajkoit”, me 14 kamera që janë montuar në impiantin në Elbasan. Sistemi që aktualisht përdoret në tenis, kriket dhe bilardo bazohet në principin e imazheve të siguruara nga tre kënde.
Në praktikë, gjashtë kamera ndjekin topin, ndërsa kamera e shtatë, e pozicionuar paralel me vijën e portës, shërben për imazhet e realitetit virtual. Ajo shfrytëzohet së situata të dyshimta gol-jogol dhe pamjet transmetohen në televizor nëpërmjet imazheve virtuale.
Gjashtë kamerat për secilën portë përllogarisin vend-ndodhjen e topit nëpërmjet imazheve video. Sistemi i analizon imazhet dhe përcakton pozicionin e topit, që nëse ka kaluar plotësisht vijën e portës jep sinjal automatik te orat të cilat mbahen në dorë arbitrat, aty ku në ekran del shkrimi GOL.
Prej momentit kur ka nisur të funksionojë në futboll dhe deri më tani, ky sistem nuk ka patur asnjëherë probleme duke evituar debatet për golat fantazëm dhe ka funksioniar në mënyrë perfekte në situatat reale të lojës.
Sipas rregullores, ku për momentin nuk është e lejuar të përdoren sisteme evazive në futboll, gjatë përdorimit të “Syrit të Fajkoit” nuk ekziston mikroçip brenda topit apo sensorë në portë.
E vetmja metodë për të kuptuar vendndodhjen e topit është nëpërmjet pamjeve vizive. Në principin e imazheve të siguruara nga tre kënde mjaftojnë vetëm dy pika, për të gjetur koordinatën e tretë, që në këtë rast është topi. Por, përdorimi i gjashtë kamerave rrit në mënyrë të dukshme saktësinë e sistemit.
Risia teknologjike, ku përfshihen kamera me rezolucion të lart dhe sistemi që përpunon të dhënat, do të qëndrojnë në “Elbasan Arena” për aq kohë sa Skënderbeu të vazhdojë rrugëtimin në Europa League me shpresën se mrekullia e radhës për korçarët do të jetë kualifikimi nga faza e grupeve.
