Gjatë mbledhjes së grupit parlamentar të Partisë Socialiste, deputeti i Shkodrës, Paulin Sterkaj riktheu në vëmendje çështjen e prishjes së kullës së Prek Calit.
Sterkaj e mori fjalën e tij teksa kërkoi që të sqaronte opinionin lidhur me këtë ngjarje, duke dhënë versionin e tij.
Sterkaj nuk përmendi emra, por thumboi Tom Doshin, i cili sipas tij po e përdor rastin për interesa të tij personale.
“Disa individë të veshur me pushtet dhe ish-pushtetarë vendorë kanë vendosur të rikonstruktojnë kullën, pra e kanë prishur ata. Ndërhyrja është bërë duke prishur muret e nisura nga ata, kur u njoftuam nga nipi i Prek Calit. Ka dalë një deputet dhe ka thënë se do e bëjë shtëpinë 3-katëshe, i cili është 15 breza larg me Prek Calin, e ka të afërt siç e kam edhe unë. Ka shkuar rruga në Vermosh e ç’të bëjnë tani thonë e kam gjysh me i marr tokën me e përdor për biznese të veta. Ne thjesht e kemi marrë në mbrojtje, kemi për qëllim mbrojtjen e trojeve të Prek Calit nga pushteti vendor”, tha ndër të tjera Sterkaj.
Deputeti i Partisë Social Demokrate në Shkodër, Tom Doshi ishte ndër politikanët e parë që reagoi për prishjen e kullës së Prek Calit, i cili deklaroi para medieve se do të kontribuonte që brenda vitit të rindërtohej kulla dhe që tashmë sipas tij do të jetë 3-katëshe.
