Pas debatit të madh lidhur me zgjedhjet në Akademinë e Shkencave, ka reaguar për herë të parë Lindita Nikolla.
Kjo e fundit, u kritikua publikisht nga akademiku Fuga në letrën e dytë dërguar kryeministrit Rama.
Nikolla “mbron” kryeministrin, teksa thotë se vendimi i tij për ndërprerjen e fondeve nuk ishte një reagim momental.
Me anë të një postimi në Facebook, ministrja e zgjedhur e Arsimit për kabinetin “Rama 2”, shkruan se kryeministri është angazhuar prej kohësh në një dialog me anëtarët e Akademisë së Shkencave, ku ka theksuar rëndësinë e reformimit të institucionit.
Në mbyllje, Nikolla e quan institucionin e Akademisë së Shkencave të kalbëzuar dhe që ka humbur çdo funksion të ekzistencës së saj.
POSTIMI I NIKOLLËS:
Kush e komenton mbrapsht politikisht, mediatikisht apo inatçorisht deklaratën e djeshme të Kryeministrit mbi Akademinë e Shkencave, si një reagim momental, është në rastin më të mirë i painformuar.
Kryeministri është angazhuar prej kohësh në një dialog me anëtarët e Akademisë së Shkencave. Në takimin e realizuar në kryeministri, në maj 2016, me akademikët dhe përfaqesuesit e Ministrisë së Arsimit e Sportit, ai ka nënvizuar domosdoshmërinë e reformimit të institucionit dhe ka kërkuar përulesisht kontribute me shkrim nga vetë akademikët.
Po ashtu, ai ka kërkuar nga Ministria e Arsimit dhe Sportit angazhim të plotë në këtë dialog, ku fatkeqësisht pritëm gjatë për një kontribut konkret dhe të vlefshëm nga ana e Akademisë së Shkencave, por që nuk erdhi kurrë.
Sidoqoftë, ne kemi vijuar punen tonë ne tri drejtime:
- Shkrimin e Strategjisë Kombëtare të Zhvillimit të Kërkimit Shkencor, Tekonologjisë dhe të Inovacionit, për vitet 2017-2022;
- Përgatitjen e Dokumentit Politik për Reformimin Institucional të Kërkimit Shkencor;
- Përgatitjen e Draft-Ligjit të ri per Shkencën, Teknologjinë dhe Inovacionin.
Produktet e punës, në të tri këto drejtime, flasin vetë dhe, me fillimin e punës së qeverisë së re, do të dalë në pah edhe pseja e deklaratës së djeshme të kryeministrit, të cilën e mbështes plotësisht, si të gjithë ata që e kanë ndjekur nga brenda ecurinë e këtij procesi. Të njëjtën bindje me kryeministrin ndajnë edhe persona të tjerë, publikisht të rreshtuar më shumë se sa një herë kundër qeverisë.
Zgjedhjet e djeshme në Akademi ishin pika e fundit që derdhi kupën e mbushur në vite, sepse dëshmuan mungesën më shembullore të çdo sensi reflektimi mbi kalbëzimin tanimë pa kthim të atij institucioni. Prandaj, edhe financimi publik i Akademisë së Shkencave në këto kushte do të ishte thjesht bashkëfajësia në heshtje përballë një fakti kokëfortë: Akademia e Shkencave ka humbur çdo arsye dhe funksion të ekzistencës së saj.
