Pas faljes së namazit të Kurban Bajramit në sheshin “Skënderbej”, ka nisur një debat i madh lidhur me vendosjen e disa ekraneve përballë monumentit të heroit kombëtar, Gjergj Kastriot Skënderbeu.
Madje, kjo ngjarje mori përmasa të mëdha, pasi myftiu Ylli Gurra u kërcënua me jetë. Ky i fundit tha se vendosja e ekraneve në atë pozicion ka qenë rastësore, ndërsa shtoi se Skënderbeu është heroi i të gjithë shqiptarëve.
Por, eksperti i bujqësisë, Hysni Gurra ka publikuar disa pamje mjaft domethënëse lidhur me debatin e madh që po zhvillohet.
Gurra ka postuar dy foto nga pelegrinazhi i shqiptarëve myslimanë në Mekë, të cilët mbajnë në duar pikërisht flamurin e Gjergj Kastriot Skënderbeut.
“Uau!!! Pelegrinët shqiptarë në një nga momentet kulminante të pelegrinazhit (Jamarat vendi ku goditet djalli me gurë) me flamurin e Skënderbeut në duar. Foto janë ekskluzive, për ndonjë mik gazetar që në këtë ditë paqe i intereson e vërteta dhe gurët duhet t’i hedhë drejt djallit e jo drejt njëri-tjetrit”, shkruan Gurra teksa publikon fotot.
