Krahas familjeve në nevojë, këtë vit shtohet kategoria e familjeve përfituese për librat shkollorë falas.
Tashmë do të përfitojnë edhe familjet që kanë mbi 3 fëmijë në arsimin parauniversitar.
“Shitja e teksteve bëhet nëpërmjet njësive tregtare të shitjes së librave ose në pika të tjera pranë shkollave, nga subjekte të licencuara. Me kërkesën e botuesve, drejtoritë e shkollave janë të detyruara të vënë në dispozicion falas një ose dy ambiente për shitjen e teksteve shkollore. Ato duhet të kenë detyrimisht pullën me hologramën e MAS”, përcaktohet në urdhrin e Ministrisë.
Qeveria ka ndarë 310 milionë lekë, që parashikohet të mbulojnë nevojat me tekste për rreth 100 mijë fëmijë.
Fillimisht prindërit do t’i blejnë tekstet shkollore dhe do të ruajnë faturën, ndërsa më pas duhet ta dorëzojnë atë për t’u kompensuar nga MAS.
Më konkretisht, përfitojnë nxënësit që vijnë nga komuniteti rom apo komuniteti egjiptian, viktimat e trafikimit, nxënës që janë në institucionet e paraburgimit dhe vuajtjes së dënimit, nxënës që vijnë nga familje që janë me ndihmë sociale, si dhe familjet me më shumë se 3 fëmijë.
Shpërndarja e librave për vitin e ri shkollor pritet të nisë javën e ardhshme, ndërsa procesi përfundon më 10 shtator.
