Lewis Hamilton i premton besnikëri Mercedesit. Piloti anglez edhe pse është shumë i kërkuar në merkato do ta vazhdojë karrierën te skuadra gjermane.
“Të lë Mercedesin?
Do ta bëj këtë vetëm kur t’i jap lamtumirën Formula 1-shit”, deklaroi fillimisht Hamilton në një intervistë. 3-herë kampioni i Botës është shumë i lumtur dhe ka gjetur ambientin perfekt te Mercedesi. Kjo është një nga arsyet që Hamilton nuk e mendon aspak largimin nga skuadra gjermane.
Në muajt e fundit është përfolur shumë për një kalim të Hamilton te Ferrari duke pasur parasysh faktin që 32-vjeçari është në skadencë kontrate me shigjetat e argjendta. Williams është një tjetër skuadër që e stimulon jo pak britanikun por vetë Hamilton ka larguar zërat e merkatos.
“Nëse do të vendosja të largohesha një ditë nga Mercedes do të më duhej ta filloja gjithçka nga zero dhe nuk e di nëse do t’ia vlente barra qiranë edhe pse Williams është një skuadër të cilën e admiroj dhe do më pëlqente që një ditë të isha pjesë e Williams dhe t’i riktheja ata në nivelet më të larta”- deklaroi, Lewis Hamilton.
