Ministria e Komunikacionit dhe Detarisë ka njoftuar sot zyrtarisht se ka nënshkruar kontratën me SH.P.K “Metal Alu&Plast” nga Danillovgradi e cila do të zhvillojë punimet në rekonstruksionin e rrugës magjistrale Ulqin–Sukubinë, respektivisht në segmentin rrugor Ulqin –Krythë, mësohet nga Komuna e Ulqinit.
Me kontratë është paraparë që punimet konform standardeve më të larta në tërësi të përfundojnë për 360 ditë, ndërsa vlera e këtij projekti kaq të rëndësishëm është 5.824.687.33 euro. Rikonstruksioni i rrugës do të fillojë në muajin shtator.
Rruga Ulqin–Krythë do të krijojë lehtësira në lëvizjen e mjeteve dhe njerëzve në këtë pjesë kaq të frekuentuar, veçmas gjatë stinës së verës. Me realizimin e këtij projekti përmbushet një kërkesë e kamotshme ndërkohë që përmirësimi i infrastrukturës rrugore mbetet detyrë dhe prioritet për strukturat udhëheqëse komunale.
