Galeria Kombëtare e Arteve si rrallëherë më parë do të jetë e hapur falas për të gjithë vizitorët për të shijuar punimet e artit figurativ shqiptar.
Ditën e diel më 13 gusht Galeria Kombëtare e Arteve do të mirëpresin publikun e saj pa qenë e nevojshme pajisja me biletë, duke nisur që nga ora 9 e mëngjesit e deri në orën 19:00.
Përveç faktit që do të jetë e hapur falas për publikun e gjerë, Galeria do të ofrojë në fundjavë edhe punët më të mira të artit figurativ shqiptar.
“Në sallën e ekspozitave ju pret ekspozita “Vepra të kthyera”. Në të do të mund të shihni punët në pikturë dhe skulpturë të disa nga artistëve më të mirë të artit figurativ shqiptar si Abdurrahim Buza, Sadik Kaceli, Vangjush Mio, Kel Kodheli, Odhise Paskali, Danish Jukniu, Guri Madhi etj. Një ekspozitë me vepra të paekspozuara prej shumë kohësh, e cila nuk duhet humbur. Gjithashtu edhe në Linjën Muzeale të GKA, hyrja do të jetë falas për të gjithë”, thuhet në njoftimin për shtyp të Galerisë Kombëtare të Arteve.
