Pas largimit të Afrim Takut nga Skënderbeu, pritet të largohet edhe Goran Vujoviç. Që prej 13 korrikut që u luajt ndeshja kundër Kairatit në Kazakistan, sulmuesi malazez nuk është dukur më në Korçë. Fillimisht ai pësoi një dëmtim në ndeshjen e turit të parë ndaj Sant Hulias, por më pas doli nga planet e stafit teknik.
Edhe pse pati sukses në debutimin me fanellën e Skënderbeut, 30- vjeçari nuk i përmbush kushtet për të udhëhequr korçarët në sulm. Trajneri Ilir Daja ka thënë se pas largimit të Hamdi Salihit, nuk është gjetur ende lojtari i duhur. Megjithatë, suksesi në Ligën e Europës me kalimin e tri tureve ka lënë pak vend për diskutime në klub.
“Ka disa ditë që është në Maqedoni, duke bërë terapi pas dëmtimit që pësoi tri javë më parë”, thonë zyrtarisht në klubin korçar për mungesën e Vujoviçit.
KONTRATA
“Goran Vujoviç është zyrtarisht futbollist i Skënderbeut. Sulmuesi ka firmosur kontratën që e lidh me klubin tonë për 2 vitet e ardhshme”. Kjo është marrëveshja e arritur me sulmuesin malazez më 15 qershor. Vujoviç firmosi për një pagë prej 5 mijë eurosh në muaj.
30-vjeçari nga Cetinja e Malit të Zi braktisi kampionët e Buduçnostit të Podgoricës për Skënderbeun, por pas vetëm një muaji stërvitje, tashmë po negociohet për prishjen e marrëveshjes. Prej ditësh palët kanë nisur bisedimet për një zgjedhje konsensuale.
Nuk dihet ende nëse futbollisti do të pranoj këtë mënyrë për t’u divorcuar me korçarët. Vujoviç erdhi si përforcim i bujshëm te korçarët, duke qenë se në sezonin e fundit me Buduçnostin kishte shkëlqyer. Sulmuesi kishte shënuar 12 gola dhe bardhekuqtë besuan se mund të ishte zëvendësuesi ideal i Hamdi Salihit.
Debutimi me Sant Hulian ishte pozitiv, por me kalimin e ditëve, stafi teknik krijoji një ide më të qartë për cilësitë e lojtarit. Kulmi i karrierës së Vujoviç është aktivizimi në kampionatin hungarez me klubin e Videoton.
Sezoni 2014-2015 është më i mirë për sulmuesin, pasi shënoi 21 gola me Sutjeskën e Nikshiqit, duke e ndihmuar këtë të fundit të shpallej kampion.
