Flamurtari pësoi dje humbjen e parë përballë Gostivarit në tokën maqedonase. Pas fitores 3-2 pak ditë më parë ndaj Makenodjas, dje kuqezinjtë kanë udhëtuar drejt Gostivarit ku kanë humbur pas golit të Ademit. Duhet theksuar se dhe kushtet në të cilat kanë qenë nuk ishin të përshtatshme. Vlonjatët kanë qenë disi të lodhur për shkak të vapës dhe temperaturave të larta si edhe nga stërvitja e zhvilluar në palestër gjatë paradites.
Ndeshja
Loja ka qenë e barabartë dhe nuk kanë munguar rastet për shënim nga të dy skuadrat. Por, në minutën e 10′, kuqezinjtë do të pësonin golin e disavantazhit pas rrjetës së gjetur nga Ilirid Ademi. Ekipi i Duros ka provuar të barazojë rezultatin, por nuk ia ka arritur, pasi Gostivari ka një mbrojtje shumë të fortë.
Ekipi kundërshtar, që ka përforcuar radhët e tij gjatë kësaj merkatoje vere me disa futbollistë mjaft cilësorë nga Liga e Parë e Maqedonisë, nuk është dorëzuar para skuadrës vlonjate. Flamurtari ka qenë shumë i përgjumur, pa arritur të kthejë rezultatin në favor të tij edhe pse ka pasur disa raste që mund të shfrytëzoheshin më mirë.
Në pjesën e dytë të ndeshjes, trajnerët e dy ekipeve do të aktivizonin në fushë lojtarët e stolit. Për vlonjatët bie ne sy aktivizimi i Alveshit, i cili nuk arriti të ndryshonte rezultatin edhe për shkak se është bashkuar me ekipin ditët e fundit dhe ende nuk e ka arritur formën e duhur. Edhe pse vlonjatët nuk kanë reshtur së kërkuari golin e barazimit, Hoxhaj dhe Neziraj kanë gabuar shumë para portës kundërshtare.
Në fund të takimit, Liçaj nuk arriti të realizonte golin me kokë, mundësitë e të cilit ishin të shumta. Gostivari ndërkohë mbrohet mirë dhe mundohet të mos lërë hapësirat për kundërshtarët, çka i jep fitoren në këtë fund ndeshjeje.
Ndeshjen e tretë miqësore në Maqedoni vlonjatet do ta luajnë në datën 7 gusht dhe përballë do të kenë ekipin Zajaz.
