Gjermania ka dalë kundër paketës së re të sanksioneve ekonomike amerikane ndaj Rusisë. Brigitte Zypries, ministrja gjermane e Ekonomisë, i ka bërë thirrje BE-së që të kundërpërgjigjet ndaj legjislacionit për sanksionet e reja të Shteteve të Bashkuara kundër Rusisë.
Sipas saj, mund të dëmtohen çështjet biznesore të kompanive Perëndimore me Rusinë.
“Ne këto sanksione i konsiderojmë kundër ligjit ndërkombëtar. Amerikanët nuk mund të ndëshkojnë kompanitë gjermane sepse kanë interesa të biznesit në shtete të tjera. Nuk duam luftë tregtare, por është e rëndësishme që Komisioni Evropian të marrë masa”, ka thënë ministrja gjermane e Ekonomisë, Brigitte Zypries, në një intervistë për gazetën Funke Mediengruppe.
Zypries pohoi gjithashtu se Berlini i ka kërkuar disa herë Uashingtonit të mos përfshijë dispozita që prekin kompani evropiane, në kuadër të legjislacionit për sanksionimin e Rusisë.
Në legjislacionin e ri që u miratua me shumicë votash nga Kongresi në SHBA, sanksionet përfshijnë edhe disa firma ruse të energjisë, ndërsa legjislacioni pritet të nënshkruhet nga presidenti Trump.
