Aplikacioni online është revolucioni më i madh i rrjetit Arkivor Kombëtar këto 27-vjet, ku studiuesit që dëshirojnë mund të studiojnë në Arkivin Qendror Shtetëror me një inventar prej 2 milion titujsh.
Ky proces është pjesë e axhendës digjitale 2015-2020 e cila ka dhe në thelb rritjen e cilësisë së shërbimit ndaj qytetarëve. Ky program është prezantuar nga drejtoria e përgjithshme e arkivave dhe ministrja e kulturës, Mirela Kumbaro.
Drejtori i Përgjithshëm i Arkivave, Ardit Bido shprehu kënaqësinë të prezantojë këtë revolucion, përsa i përket shërbimit në Arkivin Qendror Shtetëror, dy aplikacione të cilat mundësojnë digjitalizimin e plotë në Drejtorinë e Përgjithshme të Arkivave.
“Së pari, ne prezantojmë katalogun online me 2 milion tituj dosjesh, të cilat mund të aksesohen lirisht nga kushdo për të marrë informacionin historik që i nevojitet çdo studiuesi për të studiuar në sallën e studimit. Së dyti, një aplikacion me anë të të cilit mundësohet që të paracaktohet vizita në sallën e studimit, dosjen që dëshiron një studiues që të shohë dhe me garancinë e plotë që do ta gjej dosjen mbi tavolinë kur të vij për të studiuar”, tha ai.
Ky shërbim sjell lehtësinë e regjistrimit të qytetarëve edhe nga shtëpia vetëm duke futur të dhënat personale.
Kumbaro përgëzoi Bido dhe Arkivin e Shtetit për këtë risi, “Urime Arkivit për këtë instrument të ri që futi dhe që përmirësoj shërbimin për qytetarët”, tha ajo, duke u regjistruar në aplikacion.
